أول يوم دورة
ومشاعري زي الـ **
وتوقيت الدورة زي الـ **
بكرا عيد ميلاد اختي وبيكون ضخم وكبير وانا بشكل مباشر المسؤولة عن هذا الحفل
وصار لي عايشه بسباق من عشر ايام وحياتي مقلوبة وحتى احلامي بالنوم للحفل وعن الحفل ، للعلم الحفل تبع اختي الي اشتغل معها ف شغلي في الحفل هو تبع وظيفتي وليس لأنها اختي
في هذي العشر ايام عرفت قيمة نفسي بشكل حقيقي في العمل ، اتصور لو اختي وظفت الف واحد ما حتلاقي زي اخلاصي … اعامل الشي كأنو حقي …. وهذا اكبر سبب معيشني في قلق وتوتر طوال العشر الأيام هذي …
بكرا واخيرا هو يوم الحفل وبحضور ما يقارب مية شخص
انا شخصيا ما اتوقع الحفل بيكون خرافي ولكن اتمنى يكون افضل من اي حفل تسوونه في عشر ايام
اكثر حاجة شايله همها بكرا اني بيكون مكس ما بين شخصيتين .. الشخصية العملية حقت الشغل والجوكر وشخصية الليدي الكشخة بكعب وعباية عزايم وفل ميك اب .. وعمل بالانس او مكس بين هذول الكركترين صعب والله صعب … لذلك من باب الاحتياط جهزت معي عباية بديلة وسليبر بدل الكعب … الله يسهل
حتى انا نورة شخصيًا ما قدرت اركز مرة ع اطلالتي
اكثر شي يهمني هذي اللحظة انو الحفل يرضي اختي ويعجبها بصفتها رئيستي ، غيرو مو مهم …
بالنهاية هذا الشي له علاقة مباشرة بوظيفتي …
صحيح طبيعة عملي سهلة و مرنة وغالب ايامي خفيف الشغل فيها ولكن اذا جت مشاريع زي كذا اتعب فيها تعب يعوضني عن كل السنة
في هذا المشروع عرفت قيمة نفسي من ناحية سرعة الإنجاز ومهارتي في العمل تحت ضغط الوقت القصير جدًا وضغط طلبات الإدارة الي فوقي
اتوقع حفلة زي كذا لو كانت لي بتمنى شخص مثلي يكون يديرها
على اي حال ، حاليًا انا في اول يوم دورة ضروري استريح واتدلع …. لاني اكون تعبانة وجسمي تعبان و بس امشي خطوة ادوووخ … جالسه افكر في بكرا كيف اخليه يعدي بسلام ونشاط …. بكرا غير الجهد المضاعف بكون لابسه كعب يعنييي مرررررة شي مو مريح ……. الله ييسر … ياربي اتمنى فعلا تكون اطلالتي في الحفلة مميزة وراقية وكلاسي زي ما خططت لها … واكيد راح اكافئ نفسي بمساج يوم الجمعة … لوووووونق مساج .. لحظة! هو ينفع المساج في اول ايام الدورة … كأنو سمعت خبرية انو ما ينفع !! مو متأكدة
احتاج بكرا افطر فطور صحي واذا فيه حاجة تنشط الجسم احتاج اكلها …
عندي الجمعة راااحة ثم السبت الى البحرين راح امشي ماما ( وهذي قصة وحكاية ثانية ) ماعلينا 😂 وكمان في ابديت جديد صاير في بيتي من اسبوع صار التماس وطفت الكهربا وعشت في ظلام عدد من الايام وحاليا ثلاجتي وغسالتي تالفين (برضو قصة ثانية) 😂
ضروري انام الحين … نعسانة وتعبانة …..
ياربي بكرا يكون مثل خيالي واحسن ..
بكتب تصوراتي عن الحفل وراح اكتب تدوينة ثانية بعد الحفل بشوف لو كان ماتش ولا مو ماتش
– فيه وحدة بنت من الحضور حاطه في بالي اتعرف عليها عن قرب
– بكون نجمة الحفل والله
– الناس راح تنبسط من الحفل ولا احد بيصدق انو كل شي تجهز ب ١٠ ايام
– بكون رايقة وهادية لأنو كل شي مجهز وتمام وراح انبسط واتعرف ع الناس واكل واستمتع بالفقرات زي الضيوف
– بصور صورة جماعية انا وخواتي للذكرى ضروري
– راح يتحقق الغرض من هذا الحفل وراح نكون ت***
– كل شي بيكون رهيب رهيب
–
نورة تتحدث 