اليوم الخميس …
صحيت الصباح سويت شاور
رحت للمكتب
مديري مسافر ولله الحمد ، شعور بالاستقرار حاليًا … سويت اجتماعين
كولوا يناديني استاذة وهذا قرار جديد من مديري يُشكر عليه
طلعت من المكتب ع اساس بروح انا و ب نشتري هدية ل بنت اختي عشان نحتفل بتخرجها
يصادف اختي نعسانة واعتذرت ، ولاني ما سويت اي ارتباط عشانها جلست ف صالة بيتي بلا هدف
ثم قررت احجز سينما
قبلها رحت لكوفي قريب من السينما وكان معي كتاب نوال السعداوي مذكرات طبيبة
ثم رحت للفلم ، كان بايخ … بس اكلت بوب كورن تشيز وهو اكثر شي اعشقه ف حياتي
بعدها رجعت للبيت
كان خاطري اسوي عمل فني بس كنت مرهقة
سويت شويا خط عربي ثم ما عجبتني النتيجة
ثم الحين بتجهز للنوم
حجزت موعد عن اخصائيتي الي انقطعت عنها من ٦ اشهر لانو فيه موضوع طارئ وضروري احتاج احكيها عنه …
اللحظة هذي جالسه افكر في موضوع اسمه “سحب الصلاحيات” في العلاقات
وهذي تشبه التدرج في العلاقة لكن على العكس .. لمن تبدأ علاقتك بشخص خفيفة ثم تقوى
ودرجة انفتاحك مع الشخص تكون خفيفة ثم تقوى
سحب الصلاحيات هي عملية عكسية .. ف بعد ما تحس ان انفتاحك ماعاد مناسب وما عاد تحس انك مبسوط بهذي العلاقة تبدأ تخفف من انفتاحك وتبدأ تخفف من الحاجات الي تعطيها للشخص شويا شويا وكأنك ترجع للبدايات
اشوفه تحدي وحاجة مو سهلة بس قد تكون هي اذكى خيار للتخفيف من قوة العلاقات
نورة تتحدث 