هلا هلا هلا … مرة وحشتني … انشغلت وغصت بالحياة والحين انا بزحمة افكار وتشتت حسيت اني محتاجه اكتب عشان ارتب افكاري … كنت اسولف مع نفسي تو انو يا نورة ايش مشكلتك الرئيسية الي تخليك تحسين انو مكانك سر ؟ انو انا جالسه امشي بس ما جالسه امشي ؟ وطلع معي جواب كبير ورئيسي وهو التشتت … انا ما عندي خطة ملتزمة فيها بشكل يومي تجاه الحاجات الي ابغى احققها لذلك يجي ايام اسوي فيها انجاز وايام بدون انجاز وايام اكسترا انجاز .. فوضى في فوضى .. واتوقع السبب الي جالس يصير معي الان هو رد فعل لصرامتي السابقة مع نفسي … ليش من وانا طفلة سميت نفسي المنجرة نون ؟ لاني كنت من الثانوية عندي لستة مهام يومية ضروري اقفلها قبل نهاية اليوم .. طول حياتي كنت صارمة مع نفسي وجادة بشكل قوي والحين جالسه اعيش الراحة وعدم الالتزام ولكن كأنو يا نورة طول حبتين ؟ مبدئيًا احنا مو لازم نرجع ببرنامج صارم وحاجات بغضية ، وبرضو أقدر أعطيك أيام راحة كثير في البداية … بس على الاقل انا محتاجه خطة ومهام يومية تساعدني بتحقيق الهدف سواء قصير الامد ولا البعيد ، ايوا صحيح اهدافي بعدها ما صارت اكيدة ولا واضحة ولكن عمرها ما حتكون لا واضحة ولا اكيدة ف خلينا نبدأ بالمتاح والموجود ،، يعني نحط الاهداف از فرضيات ونمشي ع اساسها ومن ثم راح يتجلى لنا في منتصف الطريق اهداف اخرى او فعلا تكون هي اهدافنا الحقيقية …. حبيت ! وانا موافقة ! واحس الالتزام يصنع لي لذة يومي …. ممتاز ….
—-
كويك ابديت عن ايامي ؟
امممم .. مبدئيًا جتني حرارة من كم اسبوع … وعادةً انا مناعتي صاروخية ماشا الله وبالسنوات ما امرض ، لكن امنت بالله وقلت لعلها بسبب تغير الاجواء ثم لاحقا من اربع ايام رجعت الحرارة من جديد !!!! كيف كذا بأقل من شهرين اتعب ! ما حبيت … حتى كنت عملت قريب تحاليل شاملة بينت ان عندي نقص شديد بالحديد … شكلو هذي اشارات تقول انتبهي لاكلك يا نورة … لاني مؤخرًا صرت اهمل فقرة الحصول على غذاء مكتمل العناصر .. من اسبوع كنت في عُمان كانت رحلة عمل وكنت شايله هم زي العادة وعامله الف احتمال بطّال زي العادة لكنها كانت رحلة لطيفة جدا جدا وفعلا حبيت البلد وحسيت ممكن اسوي بزنس هناك وفيه فرصة عظيمة لانها بلد تعيش طفرة ما شاء الله
——
انا بشكل شخصي من اربع ايام تعبانة ف مخي فاضي حاليا عن اي ابديت يخص حياتي الشخصية لاني جالسه اعيش ايام متشابهه والحمدلله ع كل حال ، فيه احتمال بعد كم يوم اسافر امريكا اعرف انو قرار متهور بس يلزمني الخروج من منطقة اماني .. هاجسي الوحيد وين احط بستي ؟ لانو بيت اختي حاليا فيه ٣ قطط وما يستحمل اي قط زيادة ، تتيسر بإذن الله
نورة تتحدث 