أدري متأخرة عنكم ومقصرة ، بس رمضان … مشغولة برمضان … رغم ان ماعندي عزايم ولا خرجات بس مشغولة برمضان وجمال رمضان وروحانية رمضان ومسلسلات رمضان ، وكل شي برمضان …
علاقتي برمضان هالسنة مختلفة وجميلة صراحة ، بالعادة ازعل لمن اصحى بدري واشوف وقت الصوم طويل ويجيب الملل ، الان الوضع مختلف … اصحى الصباح ويمشي يومي بكل اريحية وسلاسة ومافيه احساس انو الوقت طويل، بالعكس حاسه انو الوقت جالس يخلص وانا ماخلصت كل اموري ، روتيني برمضان لمن اصحى اشتغل شوي ، ارسم شوي ، اروح النادي العصر ، اطبخ لي شوربة شوفان وسمبوسة هذول الاكل الرئيسي وتقريبا الوحيد لي برمضان .. مرتين للان افطرت مع ماما ، مرة مع اختي ، مع خواتي جوني البيت ، وامس افطرت مع اخوي ، بصراحة ماني حريصة ع الصخب والايفنتات الخارجية ، مركزة اكثر ع نفسي
وصح !! قريب مرة يوم ميلادي ،،، بيكون في يوم ١٠ ابريل .. زي العام !! يوم ميلادي في رمضان !! بس اتز اوكي معليش !!! بصراحة مرعوبة وخايفه من عمري الجديد ، اظني راح ادخل ٢٩ او ٣٠ غالبا بدخل ٣٠ مو متأكدة وماحس ابي اتأكد …. لكن على كل حال .. كل الفلكيين قالوا حياتك راح تزبط بعد ٢٩ وهذاني الحين بديت المس كلامهم !!! اول شي بديت اؤمن واصدق يقينًا انني بنت جميلة !!!! شعور حقيقي نابع من داخلي !!! ثانيا بديت اصدق يقيناً اني ذكية !!! شعور برضو حقيقي ونابع من داخلي …
حاسه انو علاقتي مع نفسي بدت تتحسن وتصير افضل .. كولوا بركة اقتراب مغادرتني عالم العشرينات …
فيه تكملة ، بس مشغولة كثير !! الان الساعة خمسة وباقي ع الاذان ساعة …. باي
نورة تتحدث 