أهلاً. زمان ما كتبت .. رجعت للرياض بس احتجت كم يوم للعودة للروتين والحياة واليوم تقريبا اول يوم عودة للروتين ، رحت الدوام و رحت للنادي .. والحمدلله
جالسه اتأمل حياتي … وحاسه حالي اسعد ، حاسه حالي مليانة .. تقريبا هذا الي جالسه احسه مقارنة بعمري سابقا .. سابقا احس اني مو كاملة .. احس بالنقص والضعف والعار واني دايما اقل من الاخرين … الحين احس اني مليانة .. احس اني انسانة كاملة .. حتى اذكر مرة كويس لمن اتكلم من اي احد بالعالم احس بارتباك داخلي واحس فيني شعور جوا جوا محد يشوفه يقول هالشعور خبي ضعفك يا نورة !!!! ودايما لمن اتكلم مع الناس اقول ياربي محد يشوف اني متفشلة وخجلانة من نفسي …. تقريبا هذا الشعور تلاشى واختفى وكأنه ما كان موجود .. اتكلم مع الناس بثقة وبدون افكار ومشاعر مخفية وأعبر عن نفسي بأريحية اكثر من اول …. سعيدة بهذا التقدم مرة !!! انا في عمري الجديد قررت اعيش حياتي .. وستوب للتجارب والمحاولات الضعيفة والبسيطة … العقد الجديد من عمري يحتم علي اعيش واعيش مبسوطة وبس … الحين كل تركيزي على كيف ازيد متعتي بالحياة كيف انبسط بكل ما املك من موارد وقدرات … وكمان بنفس الوقت حريصة مرة على بناء براند الارت حقي
الحين جالسه افكر في تقنين اختياراتي في الحياة والتركيز على رفع جودتها …
لن اتوانى عن اي شي يرفع سعادتي ومتعتي بالحياة .. والشي الي بخاطري راح احرص اسويه لنفسي اي وقت واي زمن
——
تنقطع الكتابة كم ساعة …
ثم أعود ….
———-
حاليا ودي اركز ع موضوعين .. الاول عندي مشكلة في قدرة الافكارة على السيطرة علي .. وايضا مشكلة الذكورة والانوثة … ودي هالشيئين يظهر لهم حل في حياتي … خلاف ذلك انا سعيدة وممتنة ومبتهجة الحمدلله الحمدلله … اقدر ما املك الحين وامتن لحياتي الحالية … واحس اني بفضل وخير كبير … والحالة الي اعشيها الان هو افضل شي بهالفترة
نورة تتحدث 