ودي اسولف عن الراحة النفسية الي جالسه اعيشها هالايام ، بصراحة اقتراح المعالجة ب (العيش بدون اهداف) هداني كثير .. احس اني رايقه واهتم بالتفاصيل اليومية واعيش يوم بيوم مو اكثر مو اقل .. حتى اختي الصغيرة لاحظت تحسن نفسيتي هاليومين … وتخيلوا شغلة غريبة جداً صارت .. حسيت ودي ارجع اطبخ !! رغم ان عندي مهام طبخ يومية بسيطة مثل صناعة العصير الاخضر وما يتبعه من (قروشة) ومواعين واكلات البيض الخفيفة ومع ذلك لا ، حسيت ابي اخذ خطوة كمان واصير اطبخ اكلي بنفسي .. يمكن فراغ الذهن خلاني استرجع حبي للطبخ والله ماعرف ! وكمان لسا جالسه اتابع مسلسلي التركي والحماس مليون !
وكمان لسا جالسه اسوي ديتوكس صار لي للحين ٢٢ يوم وحمدلله مكملة ومرتاحة عليه ، تدرون كمان اني جالسه اخسر وزن ؟ ماعرف كم بس كثير وواضح جدا .. وانا سعيدة ..
كمان لاول مرة جاني الهام عميق ورائع .. لاول مرة افكر بهذي الفكرة الي هي فقرة جديدة للسوشل ميديا لها علاقة بالاغاني الي تلمسني .. بصراحة فكرة حلوة وتبسطني جدا والحين متحمسة ادرس عالم الاضاءة لان هذي الفكرة محتاجة توزيع اضاءة صاحي .
بعد عشرين يوم راح نطلع للخبر رحلة عائلية جماعية بمناسبة زواج قريبنا … والحماس مليون
باي.
نورة تتحدث 