كتبت في 19 مارش 2026

‎حاسه بسعادة
اسمها .. سعادة الفراغ !

لي كم يوم اقاوم فكرة الوحدة
بعد سنوات من الحياة الصاخبة وال “مليانة ناس”

الحين صار لي فترة كثير ناس طلعت من حياتي
ونعم تضايقت و ما كنت سعيدة

بس الحين جالسه احس انها كانت مرحلة انتقالية وطبيعي شعوري يكون مضاعف وقتها

اما الان حاسه ذهني صافي ومخي نظيف !

صح ! ما قلت لكم ! حتى الصديقة الي اسمها م ، والي علاقتي فيها الفترة الاخيرة صارت قوية .. خف شعوري تجاهها .. سوت كم موقف غريب الفترة الاخيرة وهالمواقف سببت لي نفور ، احس احتاج اواجهها بس بعدين وماني مستعجلة ..

امس كنت احس بملل شديد وبدون شعور مني قمت ارسم ، مبسوطة ! لان بالعادة الرسم هو مهمة لازم تتسوى ، امس بس لأن مافيه شي اسويه قمت رسمت .. وانا مبسوطة اني هذي الايام صرت قريبة من الرسم لدرجة احسه اسهل وامتع شي ممكن يتسوى بلحظة ملل ..

وفيه شي مريحني بعد ، انو سفرتي الجايه صار ممكن تتأخر شوي .. بدل ما كان لازم اسافر بعد عشر ايام من الان ، صارت يمكن السفرة بتكون بعد عشرين يوم .. وانا ماعرف ليش هالفترة متعلقة بالرياض شوي ، يمكن لاني بديت رياضات جديدة وابي اركز عليها ، وابني عادات وعلاقات جديدة من خلالها .. ماعرف ..

كمان عندي ايمان ان الفراغ دايما يجي وراه فرص وحياة جديدة .. تنتهي قصص عشان تبدا قصص جديدة .. وهذي سنة الحياة ..

مؤخرًا اكتشفت اني شخص راقي ، وانتمي لعايلة راقية ! كنت اظن الرقي مربوط باسم عايلة او مستوى مادي معين .. بس لأ. اكتشفت ان الرقي هو صفة موروثة او مكتسبة مالها علاقة بالظروف الخارجية .. امي وابوي اشخاص عندهم عزة نفس عالية ورثونا اياها … اخلاقهم الاثنين عالية “رغم اختلافي الازلي مع ابوي” ..
جالسه افكر اني لوقت قريب بس بديت اقول كلمات سيئة مثل اللعن ، لاني نشأت على ان هالكلمات ممنوعة وما تنقال ..
مهذبة واشكر الناس واعرف حدودي و احترم الناس ودايما مظهري مرتب ونظيف و ما اتدخل بالخصوصيات ولا انجر لتوافه الامور .. راقية، نعم راقية .. وماعرف ليش ادركت هالشي الفترة الاخيرة بس !