ابديت عن شعوري …

قبل كل شي أحب أنوه انو لي فترة حاسه بإرهاق جسدي ، وأحس الارهاق الجسدي يأثر بشكل غير مباشر على مشاعري وأفكاري … يمكن لأني رجعة من سفر طويل لأمريكا وبعدها بعشر أيام غادرت لمدينة أحلامي (بالسيارة) وبعد ما جلست فيها أسبوع رجعت من جديد لمدينتي (خط ثاني) وفي هذي الأثناء ما رجعت أمارس الرياضة ف لياقتي ونشاطي خفوا كثير … لذلك ماعرف هذي المشاعر سببها أو اصلها جسدي ولا هي مشاعر حقيقية واصلية …

رجعت لمدينتي الأساسية ويكند ، اقول هاي لناسي وحبايبي .. أحضر كم فعالية وبعدين أرجع …
فجأة جاني هاليومين شعور بالغربة ، أنا أنتمي لمين ووين … لسا أنا بمدينتي الجديدة مابعد أسست حياتي وصار عندي روتين واضح … وهنا بمدينتي الاصلية هاليومين مقضيتها وناسة وبدون خطط … احس كمان محبطة جدا .. محبطة ان خططي وسعيي للرزق للحين ما جابوا نتيجة .. طيب ليش وكيف .. صحيح فيه علامات ايجابية انو فيه اشياء جيدة على وشك الحدوث بس ليش تأخرت ؟ أعرف اني استعجل دايما النتايج بس انا بمرحلة من حياتي صايره ما اتحمل الانتظار ابدا .. ابي الشي اذا سويته اشوف اثره الان وبسرعة .. طاقة الايجابية والانتظار و الصبر نفذت مني تماما … عشان كذا سهل مرة احبط واوقف الشي واحس بيأس ياكلني …. وانا في مدينتي الجديدة في نص ايامي … افكر بحزن كيف اجيب دخل لي للشهر الجاي … حزنت على نفسي … بكيت لحالي بنحيب … وبقلب مكسور .. حسيت اني في مكان بعيد جدا عن اهلي .. واقدر ابكي بصوت عالي …. قلت لربي … ممكن تعطيني اشارات ؟ ممكن تعلمني ايش الشي الغلط الي جالسه اسويه بحياتي وجالس يمنع عني الرزق ؟ عادي توريني الطريق ؟ انت تشوف اني اسعى ومجتهدة و عمري ما استرحت عشان أأمن حياتي ومستقبلي .. طيب ياربي ليه سكرت الباب بعد ما كان مفتوح لشهور ؟ ايش صار ؟ ايش تغير ؟ بكيت هذاك اليوم ونمت … احس بعدها جاني الهام .. الهامين اثنين … ممكن يكون لهم علاقة … ممكن الله ارسلهم لي .. الاولى فكرة (النظر للجانب الممتلئ من الكأس) حسيت أحتاج الامتنان بحياتي … أحتاج اكون اكثر ايجابية وشكر … دايما انا اشوف الناقص واحسن .. مثال صغير جدا ؟ اشتريت اليوم اساي بخمسين ريال فوقه اضافات .. احد هذي الاضافات فراولة .. الفراولة هذي المرة خلوها بدون ما يشيلون الشي الاخضر الي فيها من فوق .. اول ما استلمت الطلب قلت اووه ما شالوا الاخضر !!! عيني طاحت على الخلل الي بالطلب …. طيب بخصوص انو ربي يسر لك تروحين بسيارتك الملك لمحل اساي وتشترين من حر مالك اساي يعتبر اغلى من غيره .. ويحطون لك كل الاضافات الي نفسك فيها .. وكمان التغليف حق الاساي جميل ولطيف .. بخصوص طعم الاساي الي كنت على وشك استمتع فيه .. كلها اشياء مفروض اركز عليها أول وهلة .. أكثر من فكرة اني اتذمر ليه الفراولة كذا جا شكلها .. وقيسوا عليها كل شي في حياتي .. بشكل لا واعي تعلمت التركيز على النقص … يمكن هوس مثالية او يمكن برمجة اخذتها من السيد الي يسمونه ابوي .. لانه كان ملك الانتقاد …. حسيت اني دايما ابي اركز على الجانب الحلو بس … حتى اليوم لمن صحيت وانا لسا حزينة ومحبطة من حالي …. حاولت اذكر نفسي بالنعم .. على الاقل شهر قدام انا ضامنه انو عندي فلوس .. على الاقل عندي شقة ملك في افضل منطقة في مدينتي .. سيارتي ملك … حتى لمن احتجت فلوس من شهر كان فيه اختي واخوي يدعموني .. يعني في اسوأ احوالي فيه سند عندي … امي واختي الصغيرة والناس الي احبهم بخير وبصحة .. امورنا مستقرة … الحين عندي شقة ايجار في مدينة احلامي .. قريب راح ابدا تدريب في مركز فني ولو كان بدخل بسيط بس يظل خير وبركة … عندي حريتي الكاملة … صحتي ممتازة … جميلة و انيقة و جذابة وفي قمة شبابي … قلت لنفسي .. عادي نركز على هذي الامور شوي بدل ما نجلس كل الوقت نفكر في المستقبل والهواجيس تاكلنا ؟ ممكن ؟
جالسه احاول .. لان الشكر والامتنان يحتاج ايمان حقيقي … والان انا في مرحلة مقاومة .. لمن اذكر نفسي بنعمة يجي شي جواتي يقول بس ناقصك كذا وكذا !! الخ !
الشي الثاني والي اعتبره الهام جديد كليا وما قد تبنيته في نظام تفكيري الي هو (ما دام حصل لهم فممكن يحصل لي) يمكن اسمه (قانون الوفرة) ؟ حضرت زواج من كم يوم وكانت الزواج فاخر والعروس انزفت بسعادة … حسيت اني قدرت افرح لها و ابارك لهم هذي الفرحة .. يمكن اول احس بغصة وحسرة لمن اشوف نجاحات او افراح الناس وانا لسا اعافر بالحياة .. هالمرة تغير شعوري .. قلت هذي العروس تزوجت شخص تحبه وهي سعيدة ومبسوطة وانزفت بمكان حلو وفخم .. دام هالشي صار لها .. معناها هو شي قابل انه يتحقق لاي انسان اخر .. وبشكل تلقائي احس انه ممكن يتحقق لي …. يعني بدل ما اتضايق احس اتحدت مع جو السعادة والفرح وباركته .. اليوم شفت بنت صغيرة راكبة سيارة فاخرة … انبسطت لها وحسيت تحمست .. دام صار لها ممكن يصير لي … احس وجود نجاحات وافراح حولي شي معدي … يمكن اسمه اتحاد طاقات .. ولا ماعرف !! بس شعور بالوفرة والشعور بإمكانية حدوث الاشياء .. يعني كل الاشياء الي اتمناها .. سيارة فاخرة .. فلوس .. زوج حنون .. هي اشياء منتشرة حولي وعادية واصادفها بشكل يومي .. فهي موجودة و مألوفة و وجودها حولي يعني انها جايتني بالطريق .. بصراحة الفكرة هذي جميلة ومريحة و فيها اتساع بالافق ….

هل يا ترى فعلا هالفكرتين هم الاشارات الي الله ارسلهم لي عشان يفتح لي باب الرزق ؟ جايز وممكن