نورة تتحدث

مرحبًا….
سألت نفسي سؤال
وش الاولوية عندك لهذي المدونة ؟
المحافظة على لغتك العربية الاصيلة والقدرة على التعبير بالفصحى
ولا توثيق مراحل حياتك …
فكرت وفكرت
كلهم مهمين وكلهم هدفين اساسين لوجود مدونتي الحبيبة هذي
لكني اخترت الاولوية رقم واحد التوثيق ثم يجي لاحقا الكتابة بالفصحى
لذلك ودي ابطّل تأنيب ضمير ف كل مرة اعبّر فيها بالعامي لأنو الكتابة بالفصحى لاسيما لشخص فقد جزء من لياقته الادبية شويا صعب … مو صعب قد ما هو ياخذ وقت
ف الارتجال والكتابة المرنة يصيرون لي لمن اكتب عامي … ومرات كثير يصادف ابي اكتب لكن لا مزاجي ولا وقتي يسمحون اني اكتب بالفصحى .. ف صايره الجأ للعامي كحل بديل
ف انا في مثل هاللحظات بين خيارين يا اكتب بالعامي بسرعة بسرعة او ما اكتب …. لانو مرة ما فيني طاقة للكلام الفصيح … ف اكتب عامي اقلّ الخير واحسن من لاشيء ….
اني وي… علاقتي مع نفسي في تحسن رهيب .. صايره اشوف نفسي ك بنتي او اختي الصغيرة …. او كشخص محبب جدا جدا لقلبي … وانا في حقيقتي تجاه احبابي حنونة ومدافعة و مساندة وداعمة بكل ما املك ف حسيت طيب انا اولى بكل هذي المميزات ف صرت لمن اخطيء خطأ اسأل نفسي سؤال لو بنتي الي اخطأت كيف راح اعاملها اكيد ماراح اعصب بالعكس راح احضن واحتوي وهذا الي جالسه اسويه مع نفسي وحاسه اني جالسه اتقدم يوم ورا يوم في علاقتي مع نفسي

واها في ابديت مرة خطير … بديت اتعلم النحت … فخورة وسعيدة ….. مرة ! حلم تعلم النحت صار له اكثر من سنة وما تيسر لمن امس بالقووووة دفيت نفسي ع كلاس نحت وحمدلله كان خيار ممتاز وبكرا برضو بروح كلاس ثاني حق نحت وحلمي اسوي منحوتة كاملة لمجسم كامل …
فيه شخص لعين جواتي حاليا جالس يستهزء و يقول هذي نورة “الطفّافة” … كل يوم تتحمس لشيء وتتبناه وتطير فيه ويصير هاجسها ليل نهار .. ثم بغمضة عين تقلب الصفحة لشي ثاني
صحيح لكن ممكن نغيّر كلمة طفّافة لكلمة شغوفة .. كذا الله خلقني … احب الفن بأنواعه وكل مرة اتبنى شغف جديد .. هذي نعمة مو نقمة … والالتزام يجي لاحقا والتركيز برضو لاحقا .. هذي روح الابداع الي بداخلي منفتحة ومتقبلة وشغوووفة بكل الفنون عشان كذا اشوف نفسي في عالم جميل ومبهج وانا زي النحلة اتنقل من لون للون ومن زهرة لزهرة ف بدل التنمر هذا الي ورثته من ماما … اها صح بالمناسبة ماما دايم كانت تطلق علي هذا اللقب .. تقول “نورة راعية طفّات” طبعا تقوله على محمل السلب وانا برضو تبنيت فكرتها عني وكملت في نفس الفكرة …. ف يمكن جا الوقت الي اشوف الموضوع بطريقة مختلفة … كلمة شغوفة اشوفها شابكة اكثر مع حالتي .. وع فكرة المبدع ملول … المبدع ملول هذي فاكت بشعة ولكنها فاكت لانو نسبة الشغف عند المبدع تورّث تشتت وتعدد في الهوايات وتكون النتيجة سرعة الملل والمزاجية ف هذي سمات شخصية وليست عيب …… وكل واحد فينا عنده حاجات ناقصة في شخصيته ومو عيب ومو غلط دورك فقط تعرف تتعامل مع هذي السمات بطريقة تخدمك وتخدم اهدافك في الحياة ….
بخصوص النحت صاير شغلي الشاغل …. امس سهرانه ع صور وفيديوهات نحت … ابي مرة اتعلم وبسرعة … روح الحمل الناري طالع فيني هاليومين … ابي حالا اتعلم وبسرعة !!! … وربي الحمدلله يسر لي كلاس مع بنت لطيفة ربي سخرها لي وبإذن الله بتعلم الحرفة ع يدها ….

سفرتي لأمريكا قربت .. ويمكن قلت لكم من اول انو مررررررة مافي خاطري هذي السفرة …. لعل فجأة يجي خبر اليوم ع تويتر ان امريكا مقبلة ع حرب مع الصين … ف لعل هذا الشي يُثني اختي عن قرار السفر او يخلينا نأجله ممكن ؟ ربما .. الله يكتب الخير وين ما كان ….
اليوم كان يوم الجمعة … يوم لطيف وجميل مر كما هو مخطط له … اكلت من ف … محلي المفضل لليوقرت ولاني جالسه التزم بأكل صحي غالب الاسبوع ف تناولي لليوقرت اليوم كان بمثابة الهدية اللطيفة لنفسي بعد التزام مدة …
الميزان لسا ما جالس يعطيني نتايج زينة .. لكن قد يعود السبب لفترة الدورة الشهرية .. الان خلصت دورتي وانا مستعدة اكمل ع النظام الغدائي وماني متوترة … قررت هدف الوزن اخذه بشكل جاد وكامل .. ما وراي شي ولاني جالسه اركض عشان شي ف ريلاكس .. الهدف بيصير وراح اوصل الوزن الي ابيه بس مابي استعجل نفسي واتوتر و “ابوض” الدنيا …
بكرا ماما مسافره مع اختي للاردن .. اختي الصغيرة راح تجي تعيش عندي اسبوع لانو وقت سفر امي بيت اهلي ماراح يكون امان اني مور لاسيما انو اخونا م قرر يجلس في الرياض وجالس يرجع شويا شويا ل م القديم المتوحش لذلك ابي اقول شكرا انو الله اعطاني فل امان الحين في بيتي هذا لانو ما يعرف اللوكيشن لبيتي ، كمية امان احس فيها الحين صعب احد يحسها الا الي جرب يفقدها … حمدلله .. وطبعا بيتي اكيد مفتوح لاختي ب … ف من بكرا راح تجي وانا مرة متحمسة لها وبديت ارتب لها الغرفة حقتها ……..
نعسانة بشكل يفوق الوصف …
ياربي ايام حلوة لي الفترة الجايه
ياربي فتح وتسخير و نور ينور لي بصيرتي ويزيل عني غشاء الجهل والحيرة …….
احبك ياربي ….

أشعر أن حياتي الحالية هي نتيجة عدد من القرارات الشجاعة التي اتخذتها في حياتي السابقة ……
وأنا فخورةٌ بكل ما حصل …

ما حبيت افوت اليوم هذا بدون ما اشكر الله على النعم الي ماليتني …
ملخص عن يومي ؟
صحيت الصباح رحت السفارة الامريكية مع اختي وزوجها وبيني وبينكم ما عاد لي مزاج اسافر لولا مكان بس ابي استقر بشقتي مع ولدي (بستي) وبس ..
ولو تيسرت سفرة امريكا بسوي تجربة مجنونة جدا جدا هناك وممكن تغير لي حياتي بشكل كبير

امس تلقيت خبر مرة مرة مرة سعيد انو اختي خ انتقلت للرياض الحمدلله بعد عناء وغربة ٥ سنوات في وظيفتها

بعد ما خلصنا السفارة رحنا زرنا اخوي م الي متواجد هذي الايام ف السعودية
واها ! موضوع عودة م للسعودية مسبب لي شويا ارق وغضب …. لانو كل مرة يرجع للسعودية ينتكس و يرجع شيطان يدمر الاخضر واليابس ، صحيح اني الحين مستقلة ف سكن لحالي لكن خايفه ع امي وب الي عايشين ف بيت اهلي … خايفه عليهم منه … قصة م والي من بدأت مدونتي من اكثر من عشر سنوات وانا احكي عنها .. حياتنا مع م عبارة عن معاناة ومصائب وانا شخصيا فاقده الامل في اي شي يخصه ، ولسا اليوم افكر لو مات هل بانهار .. احس لا لانو عمري ما حسيت فيه ك اخو … وبالعكس لمن كنت صغيرة كان هو البعبع والعذاب في حياتنا … انا بس خايفه من تأنيب الضمير الي راح يصيبني في حال اختار يموت “انتحار” بحس انو كان فيه شي ممكن اسويه ولا سويته رغم اني حاليا ما املك لا طاقة ولا روح لمساعدته …. ورجاء محد يحكم وهو ما يعرف خبايا القصة .. الي عيشنا اياه م من دمار مادي ودمار نفسي قست قلوبنا عليه … وبرضو ! كل ما يقرر يرجع للطريق الصحيح كنا نسانده ونساعده ثم ينتكس ثم يرجع الشيطان الاول … وهكذا !!!!! من سنواااااات … اول شي سواه الحين لمن رجع السعودية رجع لشلة الفساد وبدأ بالعودة لهذاك العالم … النية انو يجي هنا اسبوع يخلص اوراقه ويمشي وشخصيا ومثل العادة اتوقع انو بيجلس اكثر من اسبوع اتوقع بيجلس مرة كثييير وبيرجع البعبع من اول وجديد

ما علينا!!!
اليوم جتني خدامة ماما نظفت بيتي حمدلله كنت مرة سعيدة .. شعور النظافة يبهجني مرة مرة … و الحمدلله الي سخر لي هذي العاملة والحمدلله الي مكني وقدرت ادفع لها قيمة التنظيف
ثم لاحقا رجعتها لبيت ماما واخذت البيبي معي يغير جو ف السيارة وحمدلله كان دخوله للقفص سلس مرة وجالس حبيبي يتعود ع السيارة شويا شويا عشان عندي نية اصير اخذه معه مشاوير سيارة مستقبلا … احب البيبي هذا مرة مرة … الله يحفظه لي …

وزني ؟ من زمان ما قسته بسبب الدوره الشهرية من زمان قصدي من اسبوع … وشخصيا ما اتوقع فيه انجاز كبير هذي الفترة بسبب كثرة المناسبات .. لكن بشكل شخصي داخل بيتي حمدلله ملتزمة بالاكل الصحي وسعيدة فيه وياربي تمم

لسا اكتف ع واحد من حساباتي ف السوشل ميديا وجالس يجيني مشاهدات مرة كثير … بديت احس لحياتي معنى لاني جالسه اختار المحتوى الي يلامس روحي …. لاحقا احكي عن التفاصيل لاني نعسانة

اليوم وانا مع اختي وزوجها حسيتها عائلتي او خلوني اقول قبلت بشعورها تجاههي بصفتها امي الروحية … وحتى ف الشغل جالسه احس بأمان عميق مرة انو ما راح ينتهي عقدي كذا فجأة إلا لمن هي تتأكد اني ضمنت مصدر دخل اخر … حلو الشعور الامان .. حبيته !

انا والبيبي اليوم زرنا شخص قريب ع قلبنا وشربت قهوة دي كاف واكلت حلا صحي بديل عن العشا

ياربي بارك … شكرا لله ع كل شعور ممتاز جالسه اعيشه بحياتي وشكرا لانو احبابي حولي وماما موجودة وشكرا لكل شعور حلو قادرة احس فيه وشكرا للتمكين والصحة و الراحة

أكتبُ بالوقت الصحيح
على “كنبة” صالتي
نسيتُ متى كانت آخر مرة كتبتُ بها بهذا التوقيت المثالي ..
على أي حال ..
قبل أن أكتب ما أريد كتابته …. أريد تجديد شكري وامتناني لله على نعمه التي لا تُحصى فمنزلي نعمة واستقراري نعمة والأمان الذي أشعر به الآن نعمة النعم
القطة طفلي و أحبابي وكل شيءٍ على ما يُرام … حالتي النفسية مستقرة … كل شيءٍ في حياتي يسير
وفقًا لرغباتي … الحمدلله دائمًا وأبدًا

كنتُ أفكر بالأمس بفكرةٍ جديدة وغريبة بنفس الوقت ، هل بدأتُ أخذ أطباع أبناء الأغنياء ؟ الذين لم يحفروا على الصخر ؟
وبدت حياتي ماديةً بحتة …
يراودني هذا الشعور لأنني لم أتعرف على رسالتي في هذه الحياة بعد ….
أريد التوقف عن الكتابة حالًا
ف الموضوع متشعب والتفاصيل كثيرة … ربما لاحقًا !

أولًا موضوع شهرتي السريعة في واحد من برامج التواصل جالس يضغطني .. حاليًا صرحت عن أفكار بسيطة أتبناها وجاني هجوووم ، كيف لو كملت ف هالمسار ..
صار بالي مشغول و ضغطي مرتفع واتابع التفاعل اول بأول
لذلك قررت هالاسبوع اجازة من هالبرنامج واي فكرة جديدة تطرى لي اكتبها ولاحقا انفذها

ثانيًا نومي متلخبط واحط راسي ولا انام حاليا ثلاث ونص الليل الساعة امس نمت حدود خمسة وووو لا ما حبيت !

ثالثًا قد يكون سبب عفسة المود اقتراب موعد الدورة

رابعًا اداركي لموضوع اني ارضائية للناس الي يهموني وضروري الي يهموني يكونين راضين عني وهذي مشكلة ضروري اعرف جذرها وسببها واحلها ،لاسيما اذا كنت بكمل ف موضوع الشهرة .. مبدئيًا سمعت ف يوتيوب ان جذر الموضوع هذا هو البحث عن القبول العاطفي ويلزمني اشبع نفسي من القبول عشان ما انتظره من الاخرين وطبعا لسا احتاج ابحث زيادة عن هالموضوع

خامسًا شخص في حياتي يعيش بطريقة تزعجني وماني قادرة احكي اكثر عن هالموضوع

سادسا جالسه اتسائل عن ال “بربس اوف لايف” .. لمن شفت انو جالسه اسوي محتوى وجالس ينتشر وفيه مؤيدين ومعارضين وضغط نفسي سألت نفسي سؤال وجودي هوا انا اصلا ليه جالسه اسوي الشي الي جالسه اسويه باستثناء المتعة اللحظية … وحاليا ما فيه جوااااب للاسف

سابعا وحدة من علاقاتي جالسه تجيب لي طفش واحس اني عالقه فيها

ثامنا العودة للعمل الان بعد العيد ويبدو كل شي متراكم

تاسعا ماسكه حاليا مسؤولية ثقيلة على قلبي جدا جدا جدا جدا جدا (ك) وقد تكون وحدة من الاسباب الرئيسية لتعاستي المشاعرية

السعيد انو بكرا المسا بينتهي دوري فيها ف مفروض مودي بكرا الليل يكون احسن لسببين .. اكون تخلصت من المسؤولية هذي و اكون وقتها وقفت التفاعل في البرنامج

يلا نروح للسوالف السعيدة ؟
مبدئيًا وزني جالس ينزل وهذي خبرية سعيدة اللهم لك الحمد … سعيدة ومتحفزة و عندي اصرار للوصول … كل ثمانية ايام اقيس وزني وحاليا حلت ثمانية ايام جديدة ومترددة لو اقيس بكرا او لا بسبب انو الدورة الشهرية لمن تقرب تزيد وزن الانثى دايما من كيلو لكيلوين ف اخاف بكرا اقيس واشوف انو وزني ثابت او زايد واحس باحباط

ثانيًا وهذي كنت اتمنى اخصص لها تدوينة لحال بس ما صار ..
امس صار مكالمة مررررررة ساخنة مع س …. كان فيها دموع كثير وكشف عن حقائق كثير
اكتشفنا انو علاقتنا تكاملية وانو هي امي الروحية وانا بنتها الروحية
وكلام ثاني مرة كثير اتمنى اخصص له تدوينة لحال لانها مكالمة للتاريخ
من نصف ساعة اكلت الحبوب الي تجيب النوم وحاليا نعسانة جدا … الوداع

“شويه فضفضة ف المكان الغلط”

أفكر هذه اللحظة أنه لربما مكنني الله في الأرض وأتاح لي سُبل الحياة على مصراعيها لرسالةٍ عظيمةٍ يجهزني لها …
وبالتأكيد وحتى تتوازن الحياة
وجب أن أعطي كما آخذ وأقدم للحياة كما قدمت لي … لهذا أستطيع الشعور هذه اللحظة أنني في مكانٍ مميز في هذه الحياة ..
ربما لم أتفرغ حتى هذه اللحظة لتقديم خدمات التطوع خارج نطاق حياتي الخاصة ولكنني أحاول ما أستطعت إسعاد ماما ، وأجتهد لتقديم حياةٍ طيبة للقطة حبيبي أيوتا
وأحاول مساعدة القطط الأخرى حول منزلي .. أختي الصغيرة أعتبرها وأعاملها كابنتي وأعطيتها وسأظل أعطيها ما استطعت من طاقة وجهد ومشاعر وماديات
أحب مساعدة الآخرين ، ومتى ما طلبني أحدهم المساعدة فأنا بالضرورة وفي معظم الأحيان أساعد بدون تكاسل ..

يجي مديري وتنقطع الفكرة … سوري!

على وزن أغنية “تعظيم سلام”

أود قبل أن أنام أن أجدد شكري وامتناني لكل ما يحصل في حياتي هذه الأيام .. أشعر بالسعادة وأن كل شيء على ما يرام
يطمئن قلبي وجود أحبابي بجانبي
اليوم يوم الاثنين وهو يوم اجتماعنا الأسبوعي لدى ماما ….
خرجتُ اليوم صباحًا مع الصغيرات ر و ت .. تناولنا الغداء في مطعم سوشي ثم ذهبنا للتسوق
ومؤخرًا بدأتُ ألاحظ أن رغبتي في اقتناء الماديات في ازدياد
وشكرًا لله الذي مكنني على التسوق براحة ورفاهية …
الحمدلله ، أستشعر ما يحصل في حياتي من نعم ، أستطيع إدراك النعم والعيش وسط غيمة من الامتنان والسعادة ..
هناك أشياء أخرى كثيرة أشعر تجاهها بالنعم أحدها أنوثتي وأناقتي
والكثير جدًا مما لا يسمح لي نعاسي بذكره
باي..

بحمدالله
أطير من السعادة ولا أهبط
تتجاوز الساعة الثالثة فجرًا ولكنني من فرط شغفي لا أستطيع النوم
ينجح معي مقطعٌ جديد قمتُ بتصويره في أحد حساباتي في السوشل ميديا
ويحصل على نصف مليون مشاهدة في أقل من نصف يوم … كأنني بدأتُ فهم الـ”سيكرت سوس” للنجاح بهذا النوع من المقاطع …
سعيدة جدًا ..
وأيضًا يسعدني ويبهجني بدايتي الجادة في رحلتي نحو خسارة ١٠ كيلو والدخول مجددًا في عالم الرشاقة
هذه المرة ستكون رحلةً حقيقية وجادة … أشعر بقوة رغبتي وإرادتي
أستطيع لمس إرادتي !
سأفعلها وأستطيع أن أبرهن على ذلك

يثير سعادتي أيضًا أظافري والتي حافظت حتى هذه اللحظة على طولها وجمالها

أستطيع اليوم استشعار نعم الله … وشكر الله على كل شيء..
اليوم وبشكلٍ خاص شكرتُ الله على نعمة الاستقرار .. ف بعد “بهذلة” السفر والتنقلات استقر في بيتي بأمانٍ وسلام برفقة ولدي الرائع أيوتا

حمدلله ع سلامتك .. نورتي الرياض

كويك ابديت ع ايفنت يوم الخميس …
نسترجع التدوينة السابقة ؟

– البنت الي كنت مرة ابي اتعرف عليها ما جت … ورغبتي قلت جدًا في اني اتعرف عليها لأنها ما كانت مهذبة … أكدت حضورها ثم فجأة ماجت …

– كنت نجمة صحيح ..
– الحفل كان مميز وراقي وصحيح ما كأنو تنفذ بأقل من ١٠ أيام
– كنت رايقة وهادية ، واستمتعت بالفقرات .. بس ما اكلت شي 😂 كنت مشغولة
– يس صورنا صور جماعية للذكرى أنا وخواتي
– الغرض من الحفل تحقق بشكل جزئي ، أقدر أقول تحقق بنسبة ٣٠٪؜
– كل شي كان رهيب

حمدلله …. كان يهمني رضى أختي صاحبه الحفل وفعلًا كانت سعيدة وعاجبها كل شي ….
الحمدلله ..